Published On:Jumatatu, 8 Septemba 2014

Posted by Hisia

Kiungo mshambuliaji wa Yanga, Haruna Niyonzima.

KIUNGO mshambuliaji wa Yanga, Haruna Niyonzima, amesema kocha wake Mbrazili, Marcio Maximo, hakukosea kumbadili namba.

Maximo amembadili namba Niyonzima kutoka kwenye namba nane aliyoizoea kuicheza hadi namba 11.
Akizungumza na Championi Jumatatu, Niyonzima alisema anaimudu vilivyo namba hiyo na kocha Maximo hakukosea kumbadili kwa kuwa ndiyo anayoitumia akiwa katika timu yake ya taifa ya Amavubi ya Rwanda.

“Ukiwa mchezaji unatakiwa ujue namba nyingi za kucheza, hivyo ndivyo ilivyo kwa upande wangu, nipo fiti na najua namba nyingi uwanjani tofauti na hii.

“Kocha Maximo hakukosea kunibadili namba kwa kuwa ndiyo namba ninayoitumia nikiwa katika timu ya taifa na ninaimudu kwa kufanya vyema.“Naamini nitafanya vyema msimu ujao kwenye ligi nikiwa katika namba yangu hiyo mpya na ninaamini tutatwaa ubingwa,” alisema Niyonzima.

Hata hivyo, Maximo alifunguka kuwa ameamua kumbadili namba mchezaji huyo kutokana na kasi aliyonayo ili aweze kusaidia kutoa pasi nzuri kwa wenzake, iwe rahisi katika suala zima la ufungaji.